ភ្នំពេញ៖ ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី បានហៅភាគីពាក់ព័ន្ធ មកដោះស្រាយករណីប្រើពាក្យរើសអើងភេទទី៣ ដោយទទួលបាននូវលទ្ធផលជាវិជ្ជមាន។

កិច្ចប្រជុំពិភាក្សាសម្របសម្រួលនេះធ្វើឡើង ដោយលោក អ៊ូ ប៉ុណ្ណារ៉ាត់ (ហៅនាយក្រឹម) ដើម្បីមកបកស្រាយលើករណីប្រើពាក្យរើសអើងភេទទី៣ នៅថ្ងៃអង្គារ ទី៣១ ខែតុលា ឆ្នាំ២០២៣ វេលាម៉ោង០៩:០០ព្រឹក នៅទីស្នាក់ការគណៈកម្មាធិការសិទ្ធិមនុស្សកម្ពុជា។

សេចក្ដីប្រកាសព័ត៌មានរបស់គណៈកម្មាធិការសិទ្ធិមនុស្សកម្ពុជាឱ្យដឹងថា តាមរយៈការផ្សាយផ្ទាល់ (Live Show) កម្មវិធី Cambodia's Got Talent រដូវកាលទី៣ របស់ស្ថានីយទូរទស្សន៍ ហង្សមាស នារាត្រីថ្ងៃសៅរ៍ ទី២៨ ខែតុលា ឆ្នាំ២០២៣ លោក អ៊ូ ប៊ុណ្ណារ៉ាត់ (ហៅ នាយក្រឹម) គណៈកម្មការ ម្នាក់នៃកម្មវិធីបានផ្តល់យោបល់ (Comment) លើបេក្ខជនមួយរូបជាភេទទី៣ បណ្ដាលឱ្យសាមីខ្លួន និងសាធារណជន ជាពិសេសបងប្អូនអ្នកស្រឡាញ់ភេទដូចគ្នា រួមទាំងសមាគមឥន្ទធនូកម្ពុជា ដែលធ្វើការងារពាក់ព័ន្ធនឹងអ្នក ស្រឡាញ់ភេទដូចគ្នា មានការយល់ឃើញផ្សេងៗ ជាការព្រួយបារម្ភដែលអាចបង្កអោយមានការរើសអើងដល់ក្រុមអ្នក ស្រឡាញ់ភេទដូចគ្នា (LGBTIQ) កើតមាននៅប្រទេសកម្ពុជា។

ទន្តឹមនេះ លោក កែវ រ៉េមី បានបញ្ជាក់ថា៖«ក្រោយពីបានជួបជជែកគ្នាទាំងសងខាង គណ:កម្មាធិការសិទ្ធិមនុស្សកម្ពុជាទទួលបាននូវលទ្ធផលជាវិជ្ជាមាន។ ខ្លឹមសារនឹងមានការផ្សព្វផ្សាយតាមរយ:វីដេអូខ្លី។ សូមអរគុណលោកជំទាវ ចន ចន្ទ័លក្ខិណាប្រធានសមាគមសិល្បករខ្មែរបានជួយអន្តរាគមន៍និងអរគុណជាអនេកជូន លោក អ៊ូ ប៊ុណ្ណារ៉ាត់ និងក្មួយ ណុប ដាណេដែលបានចូលរួមដោះស្រាយដើម្បីសុខដុមក្នុងសង្គមជាតិយើង»៕